పదేళ్ల క్రితమే రజనీకాంత్తో బాహుబలి లాంటి సినిమా ..?
పీరియాడికల్ సినిమాలు, చారిత్రక పాత్రలకు సినిమాటిక్ లిబర్టీతో కాస్త ఫిక్షన్, మరికాస్త మసాలా జోడించి తీస్తున్న సినిమాలకు ఇప్పుడు జనం బ్రహ్మరథం పడుతున్న విషయం తెలిసిందే. బాలీవుడ్తోపాటు ఇతర ప్రాంతీయ భాషల్లోను గడచిన కొన్నేళ్లుగా ఈ ట్రెండ్ విజయవంతంగా నడుస్తోంది. అయితే ఇలాంటి ట్రెండ్ పదేళ్ల క్రితమే సూపర్ స్టార్ రజనీకాంత్ సినిమాతో మొదలుకావాల్సి ఉందని చెపితే ఇప్పుడు చాలామంది నమ్మకపోవచ్చు. కానీ ఇది నిజం. అయితే ఈ చిత్రానికి సంబంధించి అద్భుతమైన అంచనాలతో షూటింగ్ సైతం ప్రారంభించినా అది సాకారం కాలేదు. అసలా విషయమే చాలామంది మరచిపోయారు. సీనియర్ దర్శకుడు కె.ఎస్. రవికుమార్ అటు కోలీవుడ్కు ఇటు టాలీవుడ్కు సుపరిచితుడే.. స్టార్ హీరోలతో పలు విజయవంతమైన సినిమాలను తెరకెక్కించిన ఈ డైరెక్టర్ ఎప్పుడో పదేళ్ల క్రితం సూపర్ స్టార్ రజనీకాంత్ కథానాయకుడిగా చారిత్రక కథాంశంతో ‘రానా’ చిత్రాన్ని ప్రారంభించాడు. భారీ ప్రాజెక్టుగా అప్పట్లో ప్రచారం జరిగిన ఈ చిత్రం పలు కారణాల వల్ల కొంత షూటింగ్ జరిగాక మధ్యలోనే ఆగిపోయింది. ఈ చిత్రం సమయంలో హీరో రజనీకాంత్ తీవ్ర అనారోగ్యానికి గురయ్యారు. దాంతో ఆయన దాదాపుగా నెలరోజులకు పైగా ఆసుపత్రిలో ఉండవలసి వచ్చింది. ఆ తరువాత ఈ సినిమా ఊసే అందరూ మరచిపోయారు.
అయితే ఈ చిత్రం అప్పట్లో ఈ చిత్రం సాకారమై ఉంటే అది బాహుబలిని మించి సక్సెస్ అయిఉండేదని ఆ తరువాత కొన్ని సందర్భాల్లో దర్శకుడు కె.ఎస్. రవికుమార్ వ్యాఖ్యానించాడు. ‘రానా’ చిత్రం పూర్తై ఉంటే అది చాలా గొప్ప సినిమా అయి ఉండేదని, బాహుబలి కన్నా పెద్ద విజయం సాధించేదని కూడా చెప్పుకొచ్చాడు. ఆ చిత్రాన్ని తాను పక్కా ప్లానింగ్తో 300 రోజుల్లోపై పూర్తి చేయాలని అప్పట్లో ప్రణాళిక వేసుకున్నట్టు కూడా తెలిపాడు. నిజానికి అప్పట్లో రజనీకాంత్ కున్న మార్కెట్ను పరగణనలోకి తీసుకుంటే అతడు చెప్పేవిషయంలో వాస్తవాన్ని కొట్టి పారేయలేం. అయితే మరి అంత నమ్మకమున్న ప్రాజెక్టుపై ఆ తరువాత ఎందుకు సైలెంట్గా ఉండిపోయారోనన్నది మాత్రం ఇప్పటికీ చెప్పలేదు ఈ డైరెక్టర్. స్టార్ హీరోలకు సంబంధించి కూడా ఇలాంటి భారీ ప్రాజెక్టులు ఆగిపోవడం విచిత్రమే మరి.