شلپا شیٹی کی دوسری پاری والی فلم ”نکما“ 5 جون کو ریلیز ہوگی
ایم اے سلام
بالی ووڈ ایکٹریس شلپا شیٹی لمبے وقت سے فلموں سے دور ہے۔ اب شلپا ایک بار پھر سلور اسکرین پر نظر آئیں گی۔ فلم کے لئے انہوں نے تیاریاں بھی شروع کردی ہیں۔ 13 سال تک بڑے پردے سے دور رہنے کے بعد اب شلپا شیٹی صابر خان کی فلم نکما میں نظر آئیں گی۔ فلم کے لئے ایکسائیٹیڈ شلپا نے بڑا اعلان بھی کردیا ہے۔ شلپا شیٹی نے اپنے ٹوئٹر پر لکھا نکما کی ریلیز تاریخ کا اعلان کرنے کے لئے بے تاب ہوں۔
فلم 5 جون 2020 کو ریلیز ہوگی۔ صابر کے ساتھ کام کرنے کا تجربہ شاندار رہا۔ اب آپ لوگوں کے لئے فلم دیکھنے کا انتظار ہے۔ تھیٹر میں ملیں گے۔ اس سے پہلے شلپا کو سال 2007 میں فلم ”لائف ان اے میٹرو“ اور ”اپنے“ میں دیکھا گیا۔ فلم سے اپنے 13 سال طویل بریک پر شلپا شیٹی نے کہا تھا میں فلم انڈسٹری کا حصہ ہوں اور چاہے کہیں بھی رہوں میں ہمیشہ اس انڈسٹری کا حصہ رہوں گی۔
جب آپ لائم لائٹ کو مس کرتے ہیں تو آپ کو فلم انڈسٹری کی یاد آتی ہے۔ آپ کو اچانک سے لگتا ہے کہ آپ کچھ ہار رہے ہیں اور لوگ آپ کو بھول رہے ہیں۔ میں نے ایسا کبھی محسوس نہیں کیا کیونکہ میں لگاتار ٹی وی پر کام کر رہی تھی۔ میں نے فلموں سے دوری اپنی مرضی سے بنائی تھی۔ ویسے شلپا شیٹی کو اس فلم کے بعد اور بھی فلمیں ملنی شروع ہوگئی ہیں۔ ویسے شلپا شیٹی اپنے فٹنس پروگرامس کے لئے ٹی وی کے ریالٹی شوز میں بھی مصروف ہے۔ بہرحال اب دیکھنا یہ ہے کہ اپنی دوسری پاری جس کی شروعات وہ 12 سال بعد کررہی ہیں کیا تیر مارتی ہیں۔