షాకింగ్ నెగిటివ్ నుండి పాజిటివ్ గా మారి హై టార్గెట్ ను చేరుకున్న సాహో !
‘సాహో’ సినిమాకు వచ్చిన నెగిటివ్ టాక్ మరో టాప్ హీరో సినిమాకు వచ్చి ఉంటే ఈ పాటికి ధియేటర్స్ అన్నీ ఖాళీ అయిపోయి ఉండేవి. అయితే ఇలాంటి నెగిటివ్ టాక్ లో కూడ ‘సాహో’ మూవీకి 205 కోట్ల గ్రాస్ కలక్షన్స్ ప్రపంచ వ్యాప్తంగా వచ్చింది అంటూ ఈ మూవీ నిర్మాతలు మీడియాకు విడుదల చేసిన పోస్టర్స్ ప్రభాస్ అభిమానులకు విపరీతమైన జోష్ ను కలిగిస్తున్నాయి.
ఈరోజు ఆదివారం రేపు వినాయకచవితి పండుగ అందరికీ శెలవు కావడంతో ఈ మూవీకి మరో 150 కోట్ల గ్రాస్ కలక్షన్స్ వచ్చి తీరుతాయి అన్న అంచనాలు వస్తున్నాయి. దీనితో ఈ మూవీ బయ్యర్లు పెట్టిన భారీ మొత్తాల పెట్టుబడిలో సగంవరకు రికవరీ అవుతుందని ఇండస్ట్రీ ట్రేడ్ విశ్లేషకులు అంచనాలు వేస్తున్నారు.
వచ్చే వారం ఇటు టాలీవుడ్ లోకాని అటు బాలీవుడ్ లో కాని మరి ఏ భారీ సినిమా విడుదల కాని పరిస్థితులలో ఈ మూవీకి మరొకటి పోటీ లేదు కాబట్టి చాలామంది ‘సాహో’ బయ్యర్లు నష్టాల బాట పట్టకుండా ఏదోవిధంగా తాము పెట్టిన అసలు పెట్టుబడిని రాబట్టుకునే పరిస్థితులు కనిపిస్తున్నాయి. అయితే ఈమూవీకి వచ్చిన నెగిటివ్ టాక్ రీత్యా ఎళ్ళుండి మంగళవారం నుండి ఈ మూవీకి కలక్షన్స్ విషయంలో భారీ డ్రాప్ లేకుండా ఉంటే ఈ అంచనాలు నిజం అవుతాయని విశ్లేషకులు భావిస్తున్నారు.
ఇలాంటి పరిస్థుతులలో నెగిటివ్ టాక్ కు భయపడి ‘సాహో’ ప్రమోషన్ ను ఆపవద్దనీ ఈ మూవీని మరింత ఎక్కువగా ప్రమోట్ చేయమని బయ్యర్లు ప్రభాస్ పై ఒత్తిడి చేస్తున్నట్లు సమాచారం. అన్నీ అనుకున్నట్లుగా జరిగి ‘సాహో’ మంగళవారం పరీక్షలో గట్టెక్కితే ఈ మూవీని ప్రమోట్ చేస్తూ ప్రభాస్ తెలుగు రాష్ట్రాలలోని కొన్ని ముఖ్య నగరాలలో పర్యటించే ఆలోచనలలో ఉన్నట్లు సమాచారం..