సరిగ్గా శ్వాస ఆడటం లేదా.. ఈ లక్షణాలు కనిపిస్తే జాగ్రత్త పడాల్సిందే!
శ్వాస తీసుకోవడం అనేది మనం అసలు గమనించకుండానే జరిగిపోయే ఒక నిరంతర ప్రక్రియ. కానీ ఎప్పుడైతే ఆ శ్వాస సరిగ్గా ఆడదో, అప్పుడే శరీరం ఎంత ఇబ్బంది పడుతుందో మనకు అర్థమవుతుంది. చాలామంది శ్వాస ఆడకపోవడాన్ని కేవలం అలసటగానో, కాసేపు రెస్ట్ తీసుకుంటే తగ్గిపోయే సాధారణ సమస్యగానో భావించి నిర్లక్ష్యం చేస్తుంటారు. కానీ కొన్నిసార్లు ఈ చిన్న ఇబ్బందే ఊపిరితిత్తులు లేదా గుండెకు సంబంధించిన పెద్ద అనారోగ్యానికి ముందస్తు హెచ్చరిక కావచ్చు. అందుకే శ్వాస తీసుకోవడంలో ఇబ్బందితో పాటు కొన్ని ప్రత్యేక లక్షణాలు కనిపిస్తే అస్సలు తేలిగ్గా తీసుకోకూడదు.
సాధారణంగా నడుస్తున్నప్పుడు, మెట్లు ఎక్కుతున్నప్పుడు లేదా బరువులు మోస్తున్నప్పుడు కొద్దిగా రొప్పు రావడం సహజం. కానీ ఎలాంటి శ్రమ లేకపోయినా, ప్రశాంతంగా కూర్చున్నప్పుడు కూడా ఊపిరి అందనట్టుగా అనిపించడం ప్రమాదకరమైన సంకేతం. ముఖ్యంగా రాత్రి వేళల్లో పడుకున్నప్పుడు ఊపిరి ఆడకపోవడం, గాలి కోసం లేచి కూర్చోవాల్సి రావడం లాంటివి జరిగితే వెంటనే అలర్ట్ అవ్వాలి. ఇది గుండె బలహీనపడటానికి లేదా ఉబ్బసం (ఆస్తమా) తీవ్రమవడానికి ప్రధాన లక్షణం కావచ్చు.
దీనితో పాటు శ్వాస తీసుకునేటప్పుడు గుండెల్లో నుంచి పిల్లికూతలు లేదా ఒక విధమైన ఈల లాంటి శబ్దం రావడం కూడా గమనించాల్సి ఉంటుంది. ఇది ఊపిరితిత్తుల నాళాలు కుంచించుకుపోయాయని చెప్పడానికి స్పష్టమైన నిదర్శనం. అలాగే శ్వాస ఇబ్బందితో పాటు ఛాతీలో నొప్సి, బరువుగా అనిపించడం లేదా ఛాతీని ఎవరో గట్టిగా నొక్కిపెట్టినట్టు ఉండటం గుండెపోటుకు దారితీసే సంకేతాలు కావచ్చు. శ్వాస ఆడకపోవడంతో పాటు విపరీతమైన చెమటలు పట్టడం, కళ్లు తిరగడం, కాళ్లు లేదా పాదాల్లో వాపులు రావడం వంటివి కనిపిస్తే శరీరంలో రక్తప్రసరణ వ్యవస్థలో ఏదో తీవ్రమైన లోపం ఉందని అర్థం చేసుకోవాలి.
మరో ముఖ్యమైన లక్షణం ఏమిటంటే, శ్వాస సరిగ్గా అందనప్పుడు శరీరానికి ఆక్సిజన్ సరఫరా తగ్గిపోతుంది. దీనివల్ల పెదవులు, గోళ్లు లేదా ముఖం కాస్త నీలం రంగులోకి మారే అవకాశం ఉంది. దీనిని వైద్యభాషలో సైనోసిస్ అంటారు. ఇది అత్యవసరంగా వైద్య సహాయం అందించాల్సిన పరిస్థితి. అలాగే ఎలాంటి కారణం లేకుండానే విపరీతమైన నీరసం రావడం, కొద్ది దూరం నడవడానికే ఊపిరి కోసం తల్లడిల్లిపోవడం వంటివి ఊపిరితిత్తుల్లో ఇన్ఫెక్షన్లు లేదా రక్తహీనత వల్ల కూడా కావచ్చు.
వాతావరణంలో మార్పులు, కాలుష్యం, మానసిక ఒత్తిడి లేదా ఆందోళన (యాంగ్జైటీ) వల్ల కూడా తాత్కాలికంగా శ్వాస ఆడనట్టు అనిపించవచ్చు. అయితే ఆ ఇబ్బంది కాసేపట్లోనే తగ్గిపోతే పర్లేదు కానీ, తరచూ పునరావృతమవుతుంటే మాత్రం నిర్లక్ష్యం చేయకూడదు. ఊపిరితిత్తుల ఆరోగ్యాన్ని కాపాడుకోవడానికి ధూమపానానికి దూరంగా ఉండటం, ప్రాణాయామం వంటి శ్వాస వ్యాయామాలు చేయడం ఎంత ముఖ్యమో, ఇబ్బంది కలిగినప్పుడు వెంటనే వైద్యులను సంప్రదించడం కూడా అంతే ముఖ్యం. శరీరం ఇచ్చే ఇలాంటి చిన్న చిన్న హెచ్చరికలను సకాలంలో గుర్తిస్తే పెద్ద ప్రమాదాల నుండి మనల్ని మనం కాపాడుకోవచ్చు.