చికెన్ స్కిన్ తినడం వల్ల కలిగే లాభ నష్టాలివే.. ఈ విషయాలు కచ్చితంగా గుర్తుంచుకోండి!
చికెన్ అనగానే మనందరికీ ముందుగా గుర్తొచ్చేది ఆ రుచికరమైన మాంసం. అయితే చాలా మంది చికెన్ వండుకునేటప్పుడు దానిపై ఉన్న చర్మాన్ని (స్కిన్) తొలగిస్తుంటారు. చికెన్ స్కిన్ తినడం ఆరోగ్యానికి మంచిదా కాదా అనే విషయంలో ఎప్పుడూ ఒక పెద్ద చర్చ జరుగుతూనే ఉంటుంది. నిజానికి చికెన్ స్కిన్ తినడం వల్ల కొన్ని లాభాలు ఉన్నప్పటికీ, కొన్ని నష్టాలు కూడా పొంచి ఉన్నాయి. ఈ నేపథ్యంలో స్కిన్తో కూడిన చికెన్ తినే ముందు కొన్ని ముఖ్యమైన విషయాలు తెలుసుకోవాలి.
ఒకప్పుడు చికెన్ స్కిన్ తింటే బరువు పెరుగుతారని, గుండె జబ్బులు వస్తాయని భావించేవారు. కానీ ఆధునిక పోషకాహార నిపుణుల అభిప్రాయం ప్రకారం, చికెన్ స్కిన్లో ఉండే కొవ్వు అంతా ఆరోగ్యానికి హానికరమైనది కాదు. ఇందులో అధికంగా ఉండే 'అన్శాచురేటెడ్ ఫ్యాట్స్' ముఖ్యంగా 'ఒలేయిక్ యాసిడ్' గుండె ఆరోగ్యానికి కొంతవరకు మేలు చేస్తుంది. ఇది రక్తంలోని చెడు కొలెస్ట్రాల్ను తగ్గించి, మంచి కొలెస్ట్రాల్ను పెంచడానికి సహాయపడుతుంది. అలాగే స్కిన్తో కలిపి చికెన్ను ఉడికించినప్పుడు, అది లోపల ఉన్న మాంసం ఆరకుండా, జ్యుసీగా ఉండేలా చేస్తుంది. దీనివల్ల మాంసానికి అదనపు రుచి రావడమే కాకుండా, మనం వంటలో వాడే నూనె వినియోగం కూడా తగ్గుతుంది.
అయితే లాభాల కంటే ఇందులో ఉండే నష్టాల గురించి తెలుసుకోవడం చాలా ముఖ్యం. చికెన్ స్కిన్ అనేది క్యాలరీలతో నిండి ఉంటుంది. మీరు బరువు తగ్గాలని ప్రయత్నిస్తుంటే, స్కిన్తో కూడిన చికెన్ తినడం వల్ల మీ శరీరంలోకి అదనపు క్యాలరీలు చేరి బరువు పెరిగే అవకాశం ఉంటుంది. అలాగే ఇందులో కొంత మేర సాచురేటెడ్ ఫ్యాట్స్ కూడా ఉంటాయి, వీటిని అధికంగా తీసుకోవడం వల్ల రక్తపోటు పెరగడం వంటి సమస్యలు రావచ్చు. ముఖ్యంగా షుగర్ లేదా గుండె సంబంధిత సమస్యలు ఉన్నవారు స్కిన్కు దూరంగా ఉండటమే మంచిది.
మరో ముఖ్యమైన విషయం ఏమిటంటే, ప్రస్తుతం మార్కెట్లో దొరుకుతున్న బాయిలర్ కోళ్లకు పెంచే క్రమంలో ఇచ్చే హార్మోన్లు, యాంటీబయాటిక్స్ వంటివి ఎక్కువగా చికెన్ చర్మం కింద ఉన్న కొవ్వు పొరల్లోనే పేరుకుపోతాయి. అటువంటి చికెన్ను స్కిన్తో సహా తిన్నప్పుడు ఆ రసాయనాలు నేరుగా మన శరీరంలోకి ప్రవేశించే ప్రమాదం ఉంది. పైగా చికెన్ స్కిన్ను నూనెలో డీప్ ఫ్రై చేసినప్పుడు దాని పోషక విలువలు పూర్తిగా నశించి, అది ట్రాన్స్ ఫ్యాట్స్గా మారి ఆరోగ్యానికి తీవ్ర హాని కలిగిస్తుంది. కాబట్టి మీరు ఆరోగ్యంగా ఉండి, అప్పుడప్పుడు పరిమితంగా తీసుకుంటే చికెన్ స్కిన్ వల్ల పెద్దగా ఇబ్బంది ఉండదు.