మనం రోజూ తాగే కూల్ డ్రింక్స్ లో వాడే అస్పర్టమే అనే కృత్రిమ స్వీటెనర్ వల్ల ఖచ్చితంగా క్యాన్సర్ వచ్చే అవకాశం ఉన్నట్లు ప్రపంచ ఆరోగ్య సంస్థ (WHO) గురువారం నాడు (జులై 13) ప్రకటించింది.ప్రపంచ వ్యాప్తంగా పలు వ్యాపార సంస్థలు కూల్ డ్రింక్స్, తక్కువ చక్కెర కలిగిన ఆహారాల్లో ‘అస్పర్టమే’ విస్తృతంగా వాడుతున్నాయి. అయితే ఈ కృత్రిమ స్వీటెనర్ వినియోగం వల్ల క్యాన్సర్ వచ్చే ప్రమాదం ఉన్నట్లు ప్రపంచ ఆరోగ్య సంస్థ గురువారం నాడు అధికారికంగా ప్రకటించింది.అయితే మనం కాఫీ, టీలలో వినియోగించే అస్పర్టమే ట్యాబ్లెట్స్ మాత్రం అంత ప్రమాదకారి కాదని స్పష్టం చేసింది. ప్రపంచ వ్యాప్తంగా ఆందోళనకరంగా స్థూలకాయం అత్యధికంగా పెరుగడంపై ఈమధ్య పరిశోధనలు జరిగాయి. కూల్ డ్రింక్స్ లో వినియోగించే అస్పర్టమే కృత్రిమ తీపి ‘హెపాటోసెల్లర్ కార్సినోమా’ అని పిలవబడే కాలేయ క్యాన్సర్కు కారణం అవుతుందని పలు అధ్యయనాల్లో బయటపడింది. ఇంటర్నేషనల్ ఏజెన్సీ ఫర్ రీసెర్చ్ ఆన్ క్యాన్సర్ (IARC), డబ్ల్యూహెచ్ఓ (WHO), ఫుడ్ అండ్ అగ్రికల్చర్ ఆర్గనైజేషన్ (FAO) ఇంకా జాయింట్ ఎక్స్పర్ట్ కమిటీ ఆన్ ఫుడ్ అడిటివ్స్ (JECFA).. ఉమ్మడిగా ఇందుకు సంబంధించిన వివరణాత్మక అధ్యయన నివేదికను రిలీజ్ చేశాయి.
ఇక అస్పర్టమే అంటే అస్పార్టిక్ యాసిడ్, ఫెనిలాలనైన్ అనే రెండు అమైనో ఆమ్లాలతో తయారు చేసిన కృత్రిమ తీపి. దీనిని 1980 నుంచి డైట్ డ్రింక్స్, చూయింగ్ గమ్, జెలటిన్, ఐస్ క్రీం, పాలు-పెరుగు ఉత్పత్తులు, టూత్పేస్ట్, దగ్గు సిరప్, చూయింగ్ గమ్ వంటి పలు ఆహారాలు ఇంకా శీతల పానీయాల ఉత్పత్తుల్లో ఎక్కువగా ఉపయోగిస్తున్నారు.ప్రపంచవ్యాప్తంగా సంభవించే ఎక్కువ మరణాల్లో క్యాన్సర్ అనేది ఒక ప్రధాన కారకం. ప్రతి 6 మందిలో ఒకరు ఈ క్యాన్సర్తో మరణిస్తున్నారు. క్యాన్సర్ వ్యాధిని నిరోధించే కారకాలపై ఎప్పటి నుంచో అనేక రకాల పరిశోధనలు జరుగుతున్నాయి. ఇందులో భాగంగా పానియాల్లో వినియోగించే అస్పర్టమే క్యాన్సర్ సంభావ్యత కలిగి ఉన్నట్లు బయటపడింది. అయితే పరిమిత మోతాదు వరకు దీని వల్ల ఎలాంటి ప్రమాదం ఉండదని తెల్పింది. కలోరీ కంట్రోల్ కౌన్సిల్ ప్రకారం ప్రపంచవ్యాప్తంగా దాదాపు 6 వేల ఉత్పత్తుల్లో అస్పర్టమే (కృత్రిమ స్వీటెనర్ల)ను ఎక్కువగా వాడుతున్నారు.