హర్రర్ ఆఫర్ : ఆ సినిమాలు చూస్తే పైసలిస్తరట..!
హర్రర్ సినిమాలు చూడడానికి కష్టమైన ఇష్టపడే వాళ్లు ఎంతమంది ఉంటారు. దానిని చూడడానికి భయపడే వారు కూడా ఉంటారు. కానీ, అమెరికాలో ఓ కంపెనీ.. హర్రర్ సినిమాల్ని చూసేవాళ్లకు ప్రైజ్ మనీ ఇస్తామని ప్రకటిచింది. అమెరికాలోని ఫైనాన్స్బజ్ అనే ఫైనాన్స్ కంపెనీ ఈ నొటిఫికేషన్ను విడుదల చేసింది. అక్టోబర్ నెలలో వాళ్లు ఎంపిక చేసిన పదమూడు హాలీవుడ్ హర్రర్ సినిమాల్ని పదిరోజుల్లో చూడాలి.. అది కూడా కను రెప్ప వాల్చకుండా. అలాగే భయపడకూడదు కూడా. ఈ చాలెంజ్లో గెలిస్తే 1,300 డాలర్లకి పైగా(దాదాపు లక్ష రూపాయల) ప్రైజ్మనీ అందజేస్తారు. అయితే 18 సంవత్సరాల పైబడిన వాళ్లు మాత్రమే ఈ ఉద్యోగానికి దరఖాస్తు చేసుకోవాలనే కండిషన్ పెట్టింది ఆ ఫైనాన్స్ కంపెనీ.
త్వరలో హాలీవుడ్లో కొన్ని హర్రర్ సినిమాలు విడుదల అవనున్నాయి. ఈ నేపథ్యంలో హైబడ్జెట్.. లోబడ్జెట్ హర్రర్ సినిమాల్లో ఏవి ఎక్కువగా భయపెడతాయి అనేది తెలుసుకునేందుకు ఫైనాన్స్బజ్ ఈ ప్రయత్నానికి పూనుకుంది. ఎంపికయిన వారు చూడాల్సిన జాబితాలో ‘సా, ఎమిటీవిల్లే హర్రర్, ఏ క్వైట్ ప్లేస్, ఏ క్వైట్ ప్లేస్-2, క్యాండీమ్యాన్, ఇన్సైడియస్, ది బ్లెయిర్ విచ్ ప్రాజెక్ట్, సిన్స్టర్, గెట్ అవుట్, ది పర్గే, హలోవీన్(2018), పారానార్మల్ యాక్టివిటీ, అన్నాబెల్లె’ లాంటి హర్రర్ చిత్రాలు ఉన్నాయి.
అలాగే ఒంటరిగా ఈ చిత్రాలు చూస్తున్నంత సేపు ఫిట్బిట్ సాయంతో హార్ట్, పల్స్ రేట్ను మానిటర్ చేయడానికి ఫిట్బిట్ను ఆ కంపెనీ అందిస్తోంది. సినిమా చూసే సమయంలో ఏమైనా తేడాలు కనిపిస్తే .. ఆ వ్యక్తిని మూవీ చూడడం ఆపేయమని డిస్క్వాలిఫై చేసేస్తారట. అంతేకాదు సినిమాలు చూడడానికి 50 డాలర్ల రెంటల్ డబ్బును కూడా పే చేస్తామన్నారు. ఈ ఉద్యోగానికి ‘హర్రర్ మూవీ హార్ట్ రేట్ అనలిస్ట్’ అనే పేరును పెట్టారు.