పాపం పాకిస్తాన్... ఎటూ కాకుండా పోయింది...!
తాలిబన్లకు అండగా నిలిచిన పాకిస్తాన్పై ప్రస్తుతం ప్రపంచ దేశాలు ఆగ్రహంతో ఉన్నాయి. ప్రజా ప్రభుత్వాన్ని కూల్చేసి ప్రభుత్వం ఏర్పాటు చేసిన తాలిబన్లకు ఇప్పట్లో అంతర్జాతీయ గుర్తింపు లభించేలా లేదు. సార్క్ దేశాల సమావేశానికి హాజరయ్యేందుకు తీవ్రంగా కృషి చేసిన తాలిబన్లకు పెద్ద ఎదురుదెబ్బ తగిలింది. సార్క్ దేశాల జాబితాలో తాలిబన్ల పరిపాలనలో ఉన్న ఆఫ్ఘాన్ సర్కార్ను కూడా చేర్చుకోవాలన్న పాకిస్తాన్ డిమాండ్ను సభ్య దేశాలు తోసిపుచ్చాయి. ఏకాభిప్రాయం రాకపోవడంతో... తాలిబన్లకు మద్దతు ఇచ్చినందుకు దాయాది దేశానికి గట్టి ఎదురుదెబ్బ తగిలినట్లైంది. ప్రస్తుతం తాలిబన్ ప్రభుత్వంలో అంతర్జాతీయ మోస్ట్ వాంటెడ్ టెర్రరిస్తులు... మంత్రులుగా ఉన్నారు. ఇదే ఇప్పుడు తాలిబన్లకు పెద్ద తలనొప్పిగా మారింది. అంతర్జాతీయంగా తమకు గుర్తింపు ఇవ్వాలంటూ తాలిబన్లు చేసుకున్న విజ్ఞప్తిని సార్క్ దేశాలు తోసిపుచ్చాయి. చైనా, రష్యా, పాకిస్తాన్ దేశాలు తమకు మద్దతుగా ఉండటంతో... గుర్తింపు పెద్ద కష్టం కాదనుకున్నారు తాలిబన్లు. కానీ మిగిలిన దేశాలు వ్యతిరేకించడంతో... ప్రస్తుతం ఏం చేయాలో పాలుపోవడం లేదు. ఐక్యరాజ్యసమితిలో ప్రసగించేందుకు తాలిబన్ల తరఫున రాయబారిగా సొహైల్ షహీన్కు మాత్రం అవకాశం దక్కింది. అంతే తప్ప ప్రస్తుత ఆఫ్ఘన్ ప్రధాని, ఉప ప్రధానికి మాత్రం ఎలాంటి ఆహ్వానం అందలేదు. భారత ఉపఖండం పరిధిలోని సార్క్ దేశాల విదేశాంగ మంత్రుల సమావేశానికి కూడా తాలిబన్లకు ఆహ్వానం దక్కలేదు. ఇందుకు సార్క్ సభ్య దేశాలు చెప్పిన ఏకైక కారణం ఉగ్రవాద బ్యాక్గ్రౌండ్. దీంతో అంతర్జాతీయ గుర్తింపు కోసం తాలిబన్లు నానా పాట్లు పడాల్సిందే.