'സലാർ': സോഷ്യൽ മീഡിയയിൽ ചർച്ചകൾ വൈറലാകുന്നു!
'സലാർ': സോഷ്യൽ മീഡിയയിൽ ചർച്ചകൾ വൈറലാകുന്നു! വ്യാഴാഴ്ച പുലർച്ചെ 5.12 നായിരുന്നു ടീസർ പ്രേക്ഷകരിലേക്കെത്തിയത്. സമ്മിശ്ര പ്രതികരണമാണ് ടീസറിന് സോഷ്യൽ മീഡിയയിൽ നിന്ന് ലഭിച്ചു കൊണ്ടിരിക്കുന്നത്. കെജിഎഫ് ചാപ്റ്റർ 2വിന് ശേഷം പ്രശാന്ത് നീൽ ഒരുക്കുന്ന ചിത്രമെന്ന നിലയിൽ സലാർ റിലീസിനായുള്ള പ്രേക്ഷകരുടെ കാത്തിരിപ്പും ഏറെയാണ്. ഇപ്പോഴിതാ സലാറും കെജിഎഫും തമ്മിൽ എന്തെങ്കിലും ബന്ധമുണ്ടോയെന്ന് തെരയുകയാണ് സോഷ്യൽ മീഡിയ. അതിന് പല കാരണങ്ങളുമുണ്ട്. പ്രഭാസ് ചിത്രം സലാറിന്റെ ടീസറാണിപ്പോൾ സിനിമ ഗ്രൂപ്പുകളിലും ഫാൻസ് പേജുകളിലുമടക്കം തരംഗമായിക്കൊണ്ടിരിക്കുന്നത്. സലാറിന്റെ ടീസർ പുറത്തുവന്ന സമയം തന്നെയാണ് ആദ്യത്തെ കാരണമായി സോഷ്യൽ മീഡിയ പറയുന്നത്. കെജിഎഫ് 2 ക്ലൈമാക്സിൽ റോക്കി ഭായി സ്വർണ്ണത്തിനൊപ്പം കടലിൽ മുങ്ങിപോകുന്ന സീനിൽ ഒരു ക്ലോക്ക് കാണിക്കുന്നുണ്ട്.
ആ ക്ലോക്കിലെ സമയം 5.12 ആണ്. സിനിമാറ്റിക് യൂണിവേഴ്സ് എന്ന ആശയത്തോട് കൂടുതൽ താല്പര്യം സമീപകാലത്ത് സംവിധായകർ പ്രകടിപ്പിക്കുന്നത് കൊണ്ട് തന്നെ ഈ ചിത്രവും അത്തരത്തിൽ എന്തെങ്കിലും രഹസ്യങ്ങൾ ഒളിപ്പിക്കുന്നുണ്ടോ എന്നാണ് ആരാധകർ ചോദിക്കുന്നത്. കെജിഎഫിന്റെ പാറ്റേണിനോട് സാമ്യം തോന്നിപ്പിക്കുന്ന തരത്തിലുള്ള കളർ ഗ്രേഡിങ്ങും ആരാധകരുടെ സംശയങ്ങൾക്ക് ആക്കം കൂട്ടിയിട്ടുണ്ട്. എൽസിയു (ലോകേഷ് സിനിമാറ്റിക് യൂണിവേഴ്സ്) പോലെ സലാർ ഒരു പ്രശാന്ത് നീൽ യൂണിവേഴ്സ് ആണോ എന്നാണ് മിക്കവരുടേയും ചോദ്യം. ഒപ്പം മലയാളത്തിൽ നിന്ന് പൃഥ്വിരാജും ചിത്രത്തിൽ പ്രധാന വേഷത്തിലെത്തുന്നു എന്നതും ആരാധകരെ ആവേശം കൊള്ളിക്കുന്നുണ്ട്. ഹെവി ആക്ഷൻ ത്രില്ലർ മൂഡിലാണ് ചിത്രം ഒരുക്കിയിരിക്കുന്നത് എന്ന സൂചനകളാണ് ടീസറിൽ നിന്ന് ലഭിക്കുന്നത്.
ബാഹുബലി, കെജിഎഫ് എന്നീ സിനിമകൾ പോലെ സലാറും രണ്ടു ഭാഗമായിട്ടാണ് തിയറ്ററിലെത്തുന്നത്. വലിയ താരനിരയാണ് ചിത്രത്തിൽ അണിനിരക്കുന്നത്. ശ്രുതി ഹാസനാണ് നായിക.
ജഗപതി ബാബു, മധു ഗുസ്വാമി, ഈശ്വരി റാവു. ശ്രിയ റെഡ്ഡി തുടങ്ങിയവരാണ് മറ്റു പ്രധാന താരങ്ങൾ. കെജിഎഫിനു സംഗീതം ഒരുക്കിയ രവി ബസ്രൂർ ആണ് സലാറിലും ഗാനങ്ങളും പശ്ചാത്തല സംഗീതവും ഒരുക്കുന്നത്. പൃഥ്വിയുടെ പിറന്നാൾ ദിനത്തിലാണ് ക്യാരക്ടർ പോസ്റ്റർ റിലീസ് ചെയ്തത്. വരദരാജ മന്നാർ എന്ന കഥാപാത്രമായി ഇതുവരെ കാണാത്ത മേക്കോവറിലാണ് പൃഥ്വിരാജ് ചിത്രത്തിലെത്തുന്നത്. വൈൽഡ് ലുക്കിലെത്തുന്ന പൃഥ്വിരാജ് വില്ലൻ കഥാപാത്രമാണോ എന്ന സംശയത്തിലാണ് ആരാധകർ.
200 കോടി ബജറ്റിലാണ് ചിത്രം നിർമിക്കുന്നത്. സലാറിലെ പൃഥ്വിരാജിന്റെ കഥാപാത്രത്തിന്റെ അപ്പിയറൻസ് വ്യക്തമാക്കുന്ന പോസ്റ്റർ റിലീസായപ്പോൾ തന്നെ ചിത്രത്തിന്റെ പ്രതീക്ഷ വാനോളം ഉയർന്നിരുന്നു.അതേസമയം അടുത്തിടെയായി പ്രഭാസിന്റേതായി തീയേറ്റററുകളിലെത്തിയ ചിത്രങ്ങളെല്ലാം ബോക്സോഫീസിൽ വൻ പരാജയമായിരുന്നു. അവസാനം പുറത്തിറങ്ങിയ ആദിപുരുഷ് പ്രതീക്ഷയ്ക്കൊത്ത് ഉയർന്നില്ല. വൻ ബജറ്റിലാണ് ആദിപുരുഷ് എത്തിയതെങ്കിലും തീയേറ്ററിൽ വൻ പരാജയമാവുകയായിരുന്നു.