പുതിയ ആറ് സിനിമകളുമായി ദിലീപ്: റോഷാക്കിൻ്റെ സംവിധായകനുമായി പുതിയ പ്രോജക്ട്!
പുതിയ ആറ് സിനിമകളുമായി ദിലീപ്: റോഷാക്കിൻ്റെ സംവിധായകനുമായി പുതിയ പ്രോജക്ട്! ഇടവേളകൾക്കു ശേഷം ബോക്സോഫീസ് കിരീടം തിരികെ നേടാനെത്തുന്ന ദിലീപിൻ്റെതായി ഒരുങ്ങുന്നത് ആറ് സിനിമകളാണ്. റിലീസിന് ഒരുങ്ങുന്നതും ഷൂട്ടിംഗ് പൂ‍ത്തിയാക്കി പോസ്റ്റ് പ്രൊഡക്ഷനിലുള്ളതും ഷൂട്ടിംഗ് പുരോഗമിക്കുന്നതും പ്രീപ്രൊഡക്ഷനിലുള്ള അഞ്ച് സിനിമകൾക്കു പിന്നാലെ ഇപ്പോൾ പുതിയ സിനിമയും അനൗൺസ് ചെയ്തിരിക്കുന്നു. സമീപകാലത്ത് മലയാളത്തിൽ പുതിയ കാഴ്ചാനുഭവം സൃഷ്ടിച്ച സിനിമയുടെ ശില്പികളാണ് ദിലീപിൻ്റെ പുതിയ സിനിമയുടെ പിന്നണിയിലുമുള്ളത്. രാജാവിൻ്റെ വരവ് എപ്പോഴും രാജകീയമായിരിക്കും! മലയാള സിനിമ ബോക്സോഫീസിലേക്ക് വീണ്ടും രാജകീയമായ തിരിച്ചുവരവിന് ഒരുങ്ങുകയാണ് മലയാളത്തിൻ്റെ ജനപ്രിയ നായകൻ.നടൻ സുരാജ് വെഞ്ഞാറമൂടും പ്രധാന കഥാപാത്രമായി ചിത്രത്തിലെത്തുന്നുണ്ട്.
റോഷാക്കിൻ്റെ രചന നിർവഹിച്ച സമീർ അബ്ദുളാണ് പുതിയ ചിത്രത്തിൻ്റെയും കഥ ഒരുക്കുന്നത്. മേക്കിംഗ് സ്റ്റൈലുകൊണ്ട് ഏറെ പ്രശംസ നേടിയ ചിത്രമായിരുന്നു റോഷാക്ക്. വേറിട്ടൊരു പ്രതികാര കഥ പറഞ്ഞ ചിത്രത്തിനു ഹോളിവുഡ് സ്റ്റൈലിലുള്ള മേക്കിംഗ്കൊണ്ട് വിസ്മയിപ്പിച്ച സംവിധായകനാണ് നിസാം ബഷീർ. ഈ യുവ സംവിധായകൻ ദിലീപുമായി ഒന്നിക്കുമ്പോൾ പ്രതീക്ഷ വളരെ കൂടുതലാണ്. കെട്ട്യോളാണ് എൻ്റെ മാലാഖ, റോഷാക്ക് എന്നീ ചിത്രങ്ങൾക്കു ശേഷം നിസാം ബഷീർ സംവിധാനം ചെയ്യുന്ന ചിത്രം ബാദുഷാ സിനിമാസ്, ആൻ്റോ ജോസഫ് ഫിലിം കമ്പനി, ഗ്രാൻഡ് പ്രൊഡക്‌ഷൻസ്, വണ്ടർവാൾ സിനിമാസ് എന്നിവർ സംയുക്തമായി നിർമിക്കുന്നു. മമ്മൂട്ടി നായകനായെത്തി 2022 ൽ സൂപ്പർ ഹിറ്റായ റോഷാക്കിനു ശേഷം നിസാം ബഷീർ സംവിധാനം ചെയ്യുന്ന പുതിയ ചിത്രത്തിലാണ് ദിലീപ് ഇനി നായകനാകുന്നത്. ദിലീപിനു കരിയറിൽ നിരവധി ഹിറ്റുകൾ ഒരുക്കിയ റാഫി മെക്കാർട്ടിൻ കൂട്ടുകെട്ടിലെ റാഫി സംവിധാനം ചെയ്യുന്ന ചിത്രത്തിൽ ജോജു ജോർജും ബോളിവുഡ് നടൻ അനുപം ഖേറും പ്രധാന കഥാപാത്രങ്ങളാണ്.
ഹാസ്യത്തിന് മുൻതൂക്കം നൽകുന്ന ചിത്രത്തിൽ വീണ നന്ദകുമാറാണ് നായികയാകുന്നത്. ഇതിനു പിന്നാലെ ദിലീപിൻ്റെ കരിയറിലെ ശ്രദ്ധേയ ചിത്രം ബാന്ദ്രയും റിലീസിനു തയാറെടുക്കുകയാണ്. രാമലീലയ്ക്കു ശേഷം സംവിധായകൻ അരുൺ ഗോപിയും ദിലീപും ഒന്നിക്കുന്ന ചിത്രം മുംബൈ അധോലോകത്തിൻ്റെ പശ്ചാത്തലത്തിലുള്ള കഥയാണ് പറയുന്നത്. തെന്നിന്ത്യൻ താര റാണി തമന്ന ഭട്ടിയ നായികയാകുന്ന ചിത്രം ബിഗ് ബജറ്റിൽ ആക്ഷൻ ത്രില്ലർ മൂഡിലാണ് ഒരുക്കുന്നത്. ഇന്ത്യൻ സിനിമയിലെ വമ്പൻ താരനിര അണിനിരക്കുന്ന ചിത്രത്തിൻ്റെ ടീസറിനു മികച്ച പ്രതികരണമാണ് സോഷ്യൽ മീഡിയയിൽ ലഭിച്ചത്. നിസാം ബഷീറിൻ്റെ അടക്കം ആറ് സിനിമകളാണ് ദിലിപിൻ്റെതായി ഇപ്പോൾ തയാറായിക്കൊണ്ടിരിക്കുന്നത്. വോയ്സ് ഓഫ് സത്യനാഥനാണ് ആദ്യം തിയറ്ററിലെത്തുന്നത്.ദിലീപിൻ്റെ നൂറ്റിനാൽപ്പത്തിയെട്ടാമത്തെ ചിത്രം ഒരു യഥാർത്ഥ സംഭവത്തിനെ ആസ്പദമാക്കി ബിഗ് ബജറ്റിലാണ് ഒരുക്കുന്നത്. നീത പിള്ള, പ്രണിത സുഭാഷ് എന്നിവർ നായികമാരുകുന്നു.
മലയാളത്തിലേയും തമിഴിലേയും വലിയ താരനിര അണിനിരക്കുന്ന ചിത്രത്തിൽ തെന്നിന്ത്യയിലെ പ്രഗത്ഭരായ ഫൈറ്റ് മാസ്റ്റേഴ്‌സായ രാജശേഖരൻ, സ്റ്റൺ ശിവ, സുപ്രീം സുന്ദർ, മാഫിയ ശശി എന്നിവർ സംഘട്ടന രംഗങ്ങൾ ഒരുക്കുന്നു.ബാന്ദ്രയ്ക്കു ശേഷം സമീപകാലത്ത് രണ്ടു ചിത്രങ്ങളുടെ ഷൂട്ടിംഗിൽ ഭാഗമായിരുന്നു ദിലീപ്. ഏറെ ശ്രദ്ധ നേടിയ ഉടൽ എന്ന ചിത്രത്തിനു ശേഷം രതീഷ് രഘുനന്ദൻ സംവിധാനം ചെയ്യുന്ന ചിത്രത്തിൻ്റെ ഷൂട്ടിംഗ് അവസാന ഘട്ടത്തിലാണ്. നടനും സംവിധായകനുമായ വിനീത് കുമാറിൻ്റെ പുതിയ സിനിമയിലും ദിലീപാണ് നായകനാകുന്നത്. ഷൂട്ടിംഗ് ആരംഭിച്ച ചിത്രം ഗ്രാൻഡ് പ്രൊഡക്ഷൻസിൻ്റെ ബാനറിൽ ദിലീപ് തന്നെ നിർമിക്കുന്നു. അയാൾ ഞാനല്ല, ഡിയർ ഫ്രണ്ട് എന്നീ ചിത്രങ്ങൾക്ക് ശേഷം വിനീത് ഒരുക്കുന്ന മൂന്നാമത്തെ ചിത്രം റൊമാൻ്റിക് കോമഡി വിഭാഗത്തിലാണ് ഒരുക്കുന്നത്. രാജേഷ് രാഘവൻ തിരക്കഥയും സാനു താഹിർ ഛായാഗ്രഹണം നിർവഹിക്കുന്നു. ഈ ചിത്രങ്ങൾക്കു പിന്നാലെ പ്രേക്ഷകർ ഏറെ കാത്തിരിക്കുന്ന സൂപ്പർ ഹീറോ കഥാപാത്രം പറക്കും പപ്പൻ്റെ ജോലികളും അണിയറയിൽ പുരോഗമിക്കുന്നുണ്ട്.