ജോ‍ർജിയയിൽ കണ്ണുവെച്ച് ട്രംപ്, മിഷിഗൺ കേന്ദ്രീകരിച്ച് കമലയും: ഇത്തവണ ആര് കൊണ്ട് പോകും?
ജോ‍ർജിയയിൽ കണ്ണുവെച്ച് ട്രംപ്, മിഷിഗൺ കേന്ദ്രീകരിച്ച് കമലയും: ഇത്തവണ ആര് കൊണ്ട് പോകും? നവംബ‍ർ അഞ്ചിന് തന്നെ ആരംഭിക്കുന്ന വോട്ടെണ്ണൽ കുറച്ചു ദിവസം നീളും. 2020ൽ നടന്ന തെരഞ്ഞെടുപ്പിൽ നവംബ‍ർ മൂന്നിന് വോട്ടെണ്ണൽ നടന്ന് നാല് ദിസങ്ങൾക്ക് ശേഷമാണ് ഫലപ്രഖ്യാപനം നടന്നത്. 2016ലാകട്ടെ, വോട്ടെടുപ്പിന് പിറ്റേദിവസം രാവിലെ തന്നെ ഹിലാരി ക്ലിൻ്റൺ ഡോണൾഡ് ട്രംപിനോട് തോറ്റുവെന്ന പ്രഖ്യാപനം വന്നു. അതേസമയം തങ്ങളുടെ പക്കലുള്ള വിവരങ്ങൾ അടിസ്ഥാനമാക്കി അസോസിയേറ്റഡ് പ്രസ് അടക്കമുള്ള അന്താരാഷ്ട്ര മാധ്യമങ്ങൾ അന്നു രാത്രിയോ പിറ്റേ ദിവസമോ ഫലസൂചനകൾ പ്രഖ്യാപിച്ചേക്കും. 2025 ജനുവരി 20നാണ് പുതിയ പ്രസിഡൻ്റ് വൈറ്റ് ഹൗസിൽ ചുമതലയേറ്റെടുക്കുക. അടുത്ത നാല് വർഷമാണ് കാലാവധി. പ്രസിഡൻ്റ് ജോ ബൈഡൻ ഒഴിയുന്ന വൈറ്റ് ഹൗസിലേക്ക് ഇനി ആരെത്തും, വൈസ് പ്രസിഡൻ്റും ഡെമോക്രാറ്റിക് പാർട്ടി സ്ഥാനാ‍ർഥിയുമായ കമല ഹാരിസ്സോ, മുൻ പ്രസിഡൻ്റും റിപ്പബ്ലിക്കൻ പാർട്ടി സ്ഥാനാ‍ർഥിയുമായ ഡോണൾഡ് ട്രംപോ? വീറും വാശിയും നിറഞ്ഞ പ്രചാരണങ്ങൾക്കൊടുവിൽ അമേരിക്ക നവംബ‍ർ അഞ്ചിന് വിധിയെഴുതും.
അതിന് മുൻപേ പോസ്റ്റൽ, ഏ‍ർലി വോട്ടിങ് സംവിധാനങ്ങളിലൂടെ 41 ലക്ഷത്തിലധികം അമേരിക്കക്കാർ തങ്ങളുടെ സമ്മതിദാനം വിനിയോഗിച്ചു കഴിഞ്ഞു. 270 അല്ലെങ്കിൽ അതിൽക്കൂടുതൽ വോട്ടുകൾ നേടുന്ന വ്യക്തിയാകും വൈറ്റ് ഹൗസിൽ ഇരുന്ന് അമേരിക്കയുടെ ഭരണചക്രം തിരിക്കുക. ഇക്കുറി മിഷിഗണിൽ കമല ഹാരിസ് ശ്രദ്ധ കേന്ദ്രീകരിക്കുന്നുണ്ട്. ഇസ്രായേലിന് നൽകുന്ന പിന്തുണയെ തുട‍ർന്ന് ഇവിടുത്തെ അറബ് അമേരിക്കക്കാരുടെ എതിർപ്പ് മറികടന്ന് വോട്ട് നേടുകയെന്നത് കമലയ്ക്ക് മുന്നിലെ കടമ്പയാണ്. മുൻ വ‍ർഷം ബൈഡന് അനുകൂലമായിരുന്നു മിഷിഗൺ. 15 ഇലക്ടറൽ കോളേജ് വോട്ടുകളാണ് മിഷിഗണിൽ ഉള്ളത്. ട്രംപ് ആകട്ടെ, ഇവാൻജലിക്കൽ, കൺസർവേറ്റീവ് ക്രിസ്ത്യൻ വിഭാഗത്തിൻ്റെ വോട്ട് പെട്ടിയിലാക്കാൻ ജോ‍ർജിയയിലാണ് സജീവം. 16 ഇലക്ടറൽ കോളേജ് വോട്ടുകളാണ് ഇവിടെയുള്ളത്. 2020ൽ ജോ‍ർജിയയിൽ ബൈഡനായിരുന്നു മേൽക്കൈ.
11 ഇലക്ടറൽ കോളേജ് വോട്ടുകളുള്ള അരിസോന 2016ൽ ട്രംപിന് അനൂകൂലമായെങ്കിൽ 2020ൽ ബൈഡനോടാണ് താൽപര്യം കാണിച്ചത്. ഇക്കുറി ഇവിടെ ട്രംപും കമലയും ഒപ്പത്തിനൊപ്പമാണ്. അതേസമയം നെബ്രാസ്ക ഇക്കുറി കമലയ്ക്ക് അനൂകുലമാണ്. എന്നാൽ നെവാഡ ട്രംപിന് അനുകൂലമായി വിധിയെഴുതാനാണ് സാധ്യത. ട്രംപിന് അനുകൂലമായിരുന്ന നോ‍ർത്ത് കരോലൈന ഇക്കുറി കമലയ്ക്കൊപ്പം പോയേക്കുമെന്നാണ് സൂചന. കറുത്ത വർഗക്കാർ ഏറെയുള്ള ഇവിടെ 16 ഇലക്ടറൽ കോളേജ് വോട്ടുകളുണ്ട്. യുഎസ് സാമ്പത്തികസ്ഥിതി, ജോ ബൈഡൻ ഭരണകൂടത്തിൻ്റെ നയങ്ങൾ, കൊവിഡ് 19, ഗാസ യുദ്ധം, അഫ്ഗാനിസ്ഥാനിൽ നിന്നുള്ള അമേരിക്കൽ സൈന്യത്തിൻ്റെ പിന്മാറ്റം, ഗർഭഛിദ്രാവകാശം തുടങ്ങിയ വിവിധ വിഷയങ്ങളിലാണ് ഇരു പാർട്ടികളും പ്രചാരണം കൊഴുപ്പിക്കുന്നത്.
ജോ‍ർജിയ, മിഷിഗൺ അടക്കം ഏഴു സ്റ്റേറ്റുകളിലെ ഇലക്ടറൽ കോളേജ് വോട്ടുകളാണ് പ്രസിഡൻ്റ് തെരഞ്ഞെടുപ്പിൽ നി‌‍ർണായകമാകുക. പെൻസിൽവാനിയയിലെ 20 ഇലക്ടറൽ കോളേജ് വോട്ടുകൾ നി‍ർണായകമായത് കഴിഞ്ഞ തെരഞ്ഞെടുപ്പ് ചരിത്രം. അന്ന് 20 ഇലക്ടറൽ വോട്ടുകൾ നേടിയാണ് ജോ ബൈഡൻ 538 ഇലക്ട്രൽ കോളേജ് വോട്ടുകളിൽ കേവലഭൂരിപക്ഷമായ 270 കടന്നത്. 2020ലെ സെൻസസിനെ തുട‍ർന്ന് പെൻസിൽവാനിയയിലെ ഇലക്ടറൽ കോളേജ് വോട്ടുകളുടെ എണ്ണം 19 ആയി കുറഞ്ഞിട്ടുണ്ട്.